"Əlimizdə olan son məlumata əsasən, ümumi dəyəri 4.7 milyard ABŞ dollarını aşan 32-dən çox saziş və Anlaşma Memorandumunun imzalanmasının şahidi olacağıq".

Goldmedia.az oxu.az-a istinadən xəbər verir ki, bunu iqtisadiyyat naziri Mikayıl Cabbarov Bakıda keçirilən İslam İnkişaf Bankı (IsDB) Qrupunun İllik Toplantısı çərçivəsində təşkil olunan Özəl Sektor Forumunun açılış mərasimində deyib.

O bildirib ki, Azərbaycan İslam İnkişaf Bankı Qrupu ilə uzunmüddətli tərəfdaşlığına böyük dəyər verir:

"1992-ci ildə üzv olduğumuz vaxtdan etibarən əməkdaşlığımız qarşılıqlı etimad, ortaq prioritetlər və praktiki nəticələr əsasında qurulub. Hər iki tərəf özəl sektorun inkişafı, ticarətin maliyyələşdirilməsi, infrastruktur, kiçik və orta biznesə dəstək, yaşıl keçid və rəqəmsal transformasiya kimi sahələrə xüsusi önəm verir. Bu istiqamətlər Azərbaycanın milli iqtisadi strategiyasının da əsas prioritetləri sırasındadır".

Nazirin sözlərinə görə, iqtisadiyyatın şaxələndirilməsi Azərbaycanın əsas strateji hədəflərindən biri olaraq qalır:

"İstehsal sənayesi, kənd təsərrüfatı və ərzaq emalı, logistika, bərpa olunan enerji, rəqəmsal texnologiyalar və ixrac potensialına malik digər qeyri-neft sahələrində böyük imkanlar görürük. Azərbaycanın imkanlarını İİB Qrupunun maliyyə alətləri və geniş şəbəkəsi ilə birləşdirərək həm kommersiya baxımından səmərəli, həm də inkişafyönümlü layihələrin həyata keçirilməsini dəstəkləyə bilərik".

M.Cabbarov vurğulayıb ki, bu imkanları maliyyələşdirilə bilən layihələrə çevirmək üçün Azərbaycan geniş dəstək mexanizmləri təqdim edir:

"Azərbaycan vergi və gömrük güzəştləri, investisiyaların qorunması mexanizmləri, güzəştli maliyyələşdirmə alətləri, eləcə də sənaye parkları və Ələt Azad İqtisadi Zonası kimi investisiyaya hazır platformalar daxil olmaqla geniş dəstək mexanizmləri təklif edir. Həmçinin Azərbaycanın ən böyük yenidənqurma proqramının həyata keçirildiyi azad edilmiş Qarabağ və Şərqi Zəngəzur iqtisadi rayonlarında da mühüm imkanlar görürük. Orta Dəhliz üzərində strateji mövqedə yerləşən bu platformalar Azərbaycanın Avropa, Mərkəzi Asiya və Asiyanı birləşdirən logistika və tranzit qovşağı kimi rolunu daha da gücləndirir".

Nazir əlavə edib ki, əməkdaşlığın praktik xarakteri bu gün bir sıra sənədlərin imzalanması ilə öz əksini tapacaq:

"Həmin sənədlər sırasında Azərbaycan Biznesin İnkişafı Fondu ilə İslam Korporasiyası (ICD) arasında imzalanacaq Çərçivə Agentliyi Sazişi də yer alır ki, bu sənəd biznes subyektlərinin maliyyə resurslarına çıxış imkanlarının genişləndirilməsinə xidmət edəcək".