Bakıda elektron kilid gətirmək adı ilə tanışını aldadaraq 15 min manat mənimsəməkdə təqsirləndirilən şəxs barəsində məhkəmə hökmü elan olunub.

Goldmedia.az xəbər verir ki, məhkəmə materiallarına əsasən, təqsirləndirilən şəxs xaricdən, əsasən də Türkiyədən müxtəlif mallar gətirdiyini bildirərək zərərçəkmiş şəxsin etimadını qazanıb. O, elektron darvaza kilidləri gətirəcəyi vədi ilə zərərçəkmişdən müxtəlif vaxtlarda bank köçürmələri və nağd şəkildə ümumilikdə 17 min 328 manat pul alıb.

İstintaqla müəyyən edilib ki, təqsirləndirilən şəxs ilkin mərhələdə sifariş olunan məhsulların bir hissəsini - 2328 manat dəyərində 80 ədəd elektron kilid gətirməklə qarşı tərəfdə inam yaradıb. Daha sonra isə əlavə mallar gətirəcəyi bəhanəsi ilə müxtəlif məbləğlərdə pul almağa davam edib.

Zərərçəkmiş şəxsin sözlərinə görə, o, təqsirləndirilən şəxsə ümumilikdə 17 min 328 manat verib. Bunun müqabilində yalnız 2328 manat dəyərində məhsul əldə etdiyindən ona dəymiş maddi zərərin məbləği 15 min manat təşkil edib.

Məhkəmə iclasında ifadə verən təqsirləndirilən şəxs özünü qismən təqsirli bilib. O bildirib ki, zərərçəkmişdən aldığı vəsaitləri elektron kilidlərin alınmasına deyil, şəxsi biznes fəaliyyətinə və digər ehtiyaclarına sərf edib. Təqsirləndirilən şəxs ümumilikdə 12 min 500 manat aldığını, sonradan tərəflər arasında 15 min manatlıq borc məbləği ilə bağlı razılıq əldə olunduğunu iddia edib.

Zərərçəkmiş isə bu iddiaları qəbul etməyərək, təqsirləndirilən şəxsin onu məqsədli şəkildə aldatdığını və uzun müddət ərzində həm malları, həm də pulu qaytarmadığını bildirib. O, borcun rəsmiləşdirilməsi məqsədilə tərəflər arasında notariat qaydasında 15 min manatlıq borc müqaviləsinin də bağlandığını məhkəmənin diqqətinə çatdırıb.

Məhkəmə araşdırmaları nəticəsində təqsirləndirilən şəxsin özgənin əmlakını aldatma və etibardan sui-istifadə etmə yolu ilə ələ keçirməklə xeyli miqdarda ziyan vurduğu qənaətinə gəlinib.

Hökmə əsasən, o, müttəhim Cinayət Məcəlləsinin 178.2.4-cü (xeyli miqdarda ziyan vurmaqla dələduzluq) maddəsi ilə təqsirli bilinərək 2 il 2 ay müddətinə azadlıqdan məhrum edilib.

Eyni zamanda, təqsirləndirilən şəxsin həbsdə saxlanıldığı 1 ay 26 günlük müddət cəzadan çıxılıb və onun üzərində qəti olaraq 2 il 4 gün müddətinə azadlıqdan məhrumetmə cəzası saxlanılıb.\qaynarinfo.az