ABŞ-dan Kanadaya üzən kruiz gəmisində 123 nəfər norovirusa yoluxdu

ABŞ-ın "Princess Cruises" şirkətinə məxsus "Ruby Princess" kruiz gəmisində Alyaska və Kanada istiqamətində həyata keçirilən səfər zamanı 120-dən çox sərnişin və ekipaj üzvü norovirusa yoluxub. 

Qaynarinfo xəbər verir ki, bu barədə "Guardian" qəzeti ABŞ Xəstəliklərə Nəzarət və Profilaktika Mərkəzinin (CDC) məlumatına istinadən xəbər verib.

Məlumata görə, gəmi dezinfeksiya işlərinin aparılması üçün San-Fransisko limanında dayanıb. Yoluxanlar arasında təxminən 100 sərnişin və 23 ekipaj üzvü var. Ümumilikdə gəmidə 3032 sərnişin və 1144 ekipaj üzvü olub.

Hadisədən sonra gəmidə sanitar-gigiyenik təhlükəsizlik tədbirləri gücləndirilib. Əlavə təmizlik və dezinfeksiya işləri aparılıb, xəstəlik əlamətləri müşahidə olunan sərnişinlər və ekipaj üzvləri isə təcrid edilib.

Bundan əvvəl professor Murad Şahmərdanov norovirusun əsas təhlükəsinin orqanizmin sürətlə susuzlaşmasına səbəb olması və virusun yüksək yoluxuculuq qabiliyyəti ilə bağlı olduğunu bildirmişdi.

Norovirus bağırsaq infeksiyalarına səbəb olan ən geniş yayılmış viruslardan biridir. O, yüksək yoluxuculuğu və xarici mühitə davamlılığı ilə seçilir. Xəstəliyin əsas əlamətləri ürəkbulanma, qusma, ishal, qarın ağrısı, bədən hərarətinin yüksəlməsi, halsızlıq və baş ağrısıdır.

Goldmedia.az