Keçmiş NATO rəsmisi: Alyansın müdafiə xərcləri Rusiyanı ciddi narahat edəcək

Rusiyanın NATO-nun müdafiə xərclərinin artırılması ilə bağlı yeni öhdəliklərindən narahat olacağı gözlənilir. 

Qaynarinfo "Sky News"a istinadən xəbər verir ki, bu fikri NATO və Böyük Britaniyanın Müdafiə Nazirliyinin keçmiş rəsmisi Nikolas Uilyams səsləndirib. 

Uilyams NATO-nun baş katibi Mark Ruttenin Alyansın müdafiə büdcələrinin artırılması ilə bağlı açıqlamalarını "ruhlandırıcı" adlandırıb. Onun sözlərinə görə, NATO-nun müdafiə sahəsinə hazırkı investisiyaları tarixi əhəmiyyət daşıyır:

"Düşünürəm ki, bu, həqiqətən də tarixi məqamdır. İnsanlar bu rəqəmlərin nə qədər mühüm olduğunu kifayət qədər qiymətləndirmirlər. Məsələn, 2014-cü ildə Rusiyanın Krımı ilhaq etdiyi dövrlə müqayisədə Avropa ölkələri və Kanada hər il müdafiəyə əlavə 504 milyard ABŞ dolları xərcləyir. Bu vəsait müdafiəmizin zəif tərəflərinin gücləndirilməsinə yönəldilir. Hesab edirəm ki, orta müddətli perspektivdə formalaşacaq bu potensial Rusiyanı, belə demək mümkündürsə, ciddi şəkildə narahat edəcək".

O qeyd edib ki, NATO hazırda Əfqanıstan və Liviyadakı böhranların idarə olunmasına yönəlmiş yanaşmadan yenidən kollektiv müdafiə modelinə keçir. Uilyamsın fikrincə, müdafiə sahəsinə və hərbi sənayeyə yönəldilən böyük maliyyə vəsaiti Rusiyada 1980-ci illərdəki vəziyyətin təkrarlana biləcəyi ilə bağlı narahatlıq yaradır. Həmin dövrdə NATO və ABŞ həm müdafiə xərclərinə, həm də hərbi imkanlarına görə SSRİ-ni üstələyirdi.

Bundan əvvəl "The Economist" yazmışdı ki, Almaniyanın 45-ci tank briqadası bir ay ərzində Litva ilə Belarus sərhədi boyunca hərbi təlimlər keçirib. Məqsəd Vilnüsü müdafiə etməyə və Suvalki dəhlizini nəzarətdə saxlamağa hazır olmaqdır.

Nəşr qeyd edib ki, Almaniya Soyuq müharibədən sonra ilk dəfə olaraq hərbi bölmələrini daimi əsasda xaricdə yerləşdirir. Eyni zamanda, bölgədə ABŞ hərbi kontingentinin sayının azalması NATO ölkələrini Şərqi Avropanın ABŞ-ın birbaşa dəstəyi olmadan necə müdafiə edilə biləcəyini nəzərdən keçirməyə vadar edir.

Goldmedia.az