Çin dağıdıcı daşqınlardan sonra güclü tayfuna hazırlaşır
Çinin şərq sahillərinə güclü Bavi tayfunu yaxınlaşır. Bu, ölkə üçün bir sıra dağıdıcı fırtına və daşqınlardan sonra növbəti ciddi sınaq ola bilər.
Goldmedia.az "Associated Press" (AP) agentliyinə istinadən xəbər verir ki, son bir həftə ərzində təbii fəlakətlər Çinin müxtəlif bölgələrində ən azı 50 nəfərin ölümünə səbəb olub.
Sinoptiklərin məlumatına görə, tayfunun episentrində küləyin sürəti saatda 162 kilometrə çatır. Əvvəlcə fırtına Tayvanın şimalından keçəcək. Cümə axşamından etibarən burada güclü yağışlar və küləkli hava gözlənilir.
Tayvanın paytaxtı Taybeydə məktəblər bağlanıb, balıqçı gəmiləri təhlükəsiz şəkildə limanlara yerləşdirilib. Yaponiya, Honkonq və digər istiqamətlərə bir çox aviareyslər ləğv edilib.
Hazırkı proqnoza əsasən, tayfun Yaponiyanın ucqar adalarından keçdikdən sonra şənbə günü axşam Şanxayın cənubunda quruya çıxacaq.
Çin hakimiyyəti artıq təbii fəlakətə qarşı genişmiqyaslı hazırlıqlara başlayıb. Çjetszyan vilayətində 17 mindən çox insan təxliyə edilib, təxminən 170 min xilasedici isə yüksək hazırlıq vəziyyətinə gətirilib.
Qonşu Futszyan vilayətində güclü külək və yüksək dalğalar səbəbindən bərə əlaqəsi dayandırılıb, balıqçı gəmilərinə isə limanlara qayıtmaq göstərişi verilib.
Bu həftənin əvvəlində Bavi supertayfun statusunda olub və Sakit okeandakı Saypan adası və digər ABŞ ərazilərində dağıdıcı küləklərə səbəb olub. Lakin daha sonra tədricən zəifləməyə başlayıb.
Bu arada Çinin cənubunda tropik Maisak fırtınasının nəticələrinin aradan qaldırılması davam edir. Quansi vilayətində günlərlə davam edən rekord yağışlar genişmiqyaslı daşqınlara səbəb olub və nəticədə 39 nəfər həlak olub.
Güclü yağıntılar səbəbindən su anbarları dolub, Hençjou şəhərində bəndin bir hissəsi dağılıb. Bu isə güclü palçıqlı su axınına və geniş ərazinin su altında qalmasına səbəb olub. Bir çox sakin elektrik enerjisi olmadan binaların yuxarı mərtəbələrində köməksiz qalıb və xilasedicilərin yardımını bir neçə gün gözləyib.\qaynarinfo
Goldmedia.az
Mövcüd problemlərinizi və təkliflərinizi bizə göndərə bilərsiniz. E-mail: [email protected] Telefon: (+994) 55 740 69 26
