Macarıstanın "Zalaeqerseq" (ZTE) klubunun futbolçusu Bençe Varkoni karyerasını Azərbaycanda davam etdirəcək.

Qaynarinfo xəbər verir ki, bu barədə Macarıstanın "Nemzeti Sport" nəşri və transfer xəbərləri üzrə etibarlı mənbə kimi tanınan Saşa Tavolyer məluamt yayıb.

Məlumata əsasən, 24 yaşlı mərkəz müdafiəçisi "Qarabağ"la anlaşıb. Ağdam klubu Macarıstan təmsilçisinə bu transfer üçün 1 milyon avro ödəyəcək. Futbolçu "Qarabağ"la 3 illik müqavilə imzalayacaq.

Bençe Varkoni MTK akademiyasının yetirməsidir və 2021-ci ildə Macarıstan çempionatının yüksək liqasında debüt edib. "Kozarmişlen" klubunda icarə əsasında çıxış etdikdən sonra üç il əvvəl ZTE-yə keçib. Əvvəlcə icarə əsasında komandaya qoşulan futbolçunun transfer hüquqları 2024-cü ilin yayında klub tərəfindən tam alınıb.

"Transfermarkt" portalının məlumatına görə, Varkoninin ZTE ilə müqaviləsi 2027-ci ilə qədər qüvvədədir və əlavə bir il uzadılma imkanı da nəzərdə tutulub.

Mərkəz müdafiəçisi ötən mövsüm Macarıstan çempionatında 30, ölkə kubokunda isə 6 oyunda meydana çıxıb. Ümumilikdə isə o, ölkə yüksək liqasında 83 qarşılaşmada forma geyinib.

O, Macarıstanın U-21 millisinin sabiq üzvüdür.