Bakıda fəaliyyət göstərən "Eliko” Məhdud Məsuliyyətli Cəmiyyəti (MMC) Mərkəzi Bank tərəfindən cərimələnib.

Qaynarinfo-nun məlumatına görə, şirkət barəsində İnzibati Xətalar Məcəlləsinin 602.4-cü maddəsi (sahibkarlıq sahəsində yoxlamaların tənzimlənməsi və sahibkarların maraqlarının müdafiəsi haqqında qanunvericiliyin pozulması) ilə inzibati xəta protokolu tərtib olunub və iş məhkəmədə baxılıb.

Mərkəzi Bank tərəfindən "Eliko” MMC-də aparılan plandankənar tematik yoxlama 2025–2026-cı illəri əhatə edib. Yoxlama zamanı son 255 gün üzrə müşahidə kameralarının görüntülərində fasilələr və bəzi hallarda görüntünün tam dayanması aşkar edilib. Araşdırma nəticəsində görüntü kəsilməsindən əvvəl xəzinədarın mobil telefonla əməliyyat apardığı, daha sonra isə kameraların bir müddət işləmədiyi müəyyən olunub. Bu səbəbdən son 6 ayın kamera görüntüləri tam şəkildə yoxlayıcıya təqdim edilməyib.

Bundan başqa, müştərilərin valyuta əməliyyatlarının Mərkəzi Bankın vahid informasiya sisteminə daxil edilməməsi halları da aşkarlanıb.

Yoxlama zamanı həmçinin bir sıra qanun pozuntuları müəyyən edilib: nağd valyutanın müəyyən edilmiş limitlərdən artıq satılması və alınması, əməliyyatların şəxsiyyəti təsdiq edən sənəd olmadan aparılması, gündəlik limitlərin aşılması, kamera görüntülərinin qanunla tələb olunan müddətdə saxlanılmaması, bəzi əməliyyatların kameraların söndürülməsi ilə həyata keçirilməsi, silahlı mühafizə olmadan böyük məbləğdə vəsait daşınması, yeni işçi barədə məlumatların təqdim edilməməsi, kənar şəxslərin obyektə daxil olmasına yol verilməsi, əməliyyatların düzgün qaydada qeydiyyata alınmaması, müştərilərə qəbzlərin verilməməsi və kassanın gündəlik dövriyyə arayışlarının tərtib edilməməsi kimi hallar qeyd olunub.

Məhkəmənin qərarı ilə "Eliko” MMC İnzibati Xətalar Məcəlləsinin 602.4-cü maddəsi ilə təqsirli bilinib və 1000 manat məbləğində cərimə edilib.

Qeyd edək ki, nizamnamə kapitalı 900 min manat olan şirkətin qanuni təmsilçisi və direktoru Kazımov Ramil Adil oğludur. Şirkətin hüquqi ünvanı Bakı şəhəri, Yasamal rayonu, Hüseyn Cavid prospekti, ev 520-də yerləşir.