İngiltərədə əsas hüquqi işlərin süni intellekt-hüquqşünas tərəfindən yerinə yetirildiyi və uğurla nəticələnən ilk məhkəmə prosesi qeydə alınıb. Məhkəmədə qələbə avtomatlaşdırılmış hüquqi sənədlərin hazırlanması üzrə ixtisaslaşan "Garfield AI” şirkətinin müştərisi tərəfindən qazanılıb.

Goldmedia.az xəbər verir ki, bu barədə hadisəni misli görünməmiş hal kimi qiymətləndirən "The Guardian” nəşri məlumat yayıb.

HR məsləhətçisi Tamires Kamal Takvidir 7 min funt sterlinq məbləğində borcun geri alınması üçün "Garfield AI” xidmətindən istifadə edib. O, xidmətə görə təxminən 400 funt sterlinq ödəyib. Süni intellekt iddia ərizəsini hazırlayıb, məhkəmə prosesinə start verib və məhkəmə başlamazdan əvvəl bütün hüquqi işləri yerinə yetirib. Buraya dörd şahid ifadəsinin və məhkəmə üçün sənədlər paketinin hazırlanması da daxil olub.

Məhkəmə araşdırması mayın 14-də Uondsvort Dairə Məhkəməsində keçirilib və təxminən üç saat davam edib. Cavabdeh tərəfin hüquqşünaslar tərəfindən təmsil olunmasına və qarşılıqlı iddia qaldırmasına baxmayaraq, məhkəmə Takvidirin xeyrinə qərar çıxarıb və borcun ona ödənilməsini hökm edib.

Bununla belə, qeyd olunur ki, məhkəmə iclasında müştərini birbaşa insan vəkil – Dominik Li təmsil edib. O bildirib ki, süni intellekt tərəfindən hazırlanmış materiallar aydın və effektiv şəkildə tərtib olunub. Lakin vəkil vurğulayıb ki, məhkəmədə çıxış etmək hələ də yalnız insanlara məxsus vəzifə olaraq qalır.

"Garfield AI” şirkətinin həmtəsisçisi Filip Yanq bu nəticəni ədalət mühakiməsi üçün əlamətdar hadisə adlandırıb.\qaynarinfo.az