Böyük Britaniyada rekord istilər fonunda bəzi London ev sahibləri planlaşdırma və tikinti qaydalarına görə yaşayış evlərində quraşdırılmış kondisionerləri sökməyə məcbur olurlar.

Goldmedia.az ziare.com-a istinadən xəbər verir ki, yerli hakimiyyət orqanları kondisionerlərin karbon emissiyalarını artırdığını hesab edir və onların yalnız son çıxış yolu kimi istifadə edilməli olduğunu bildirir.

Bu yanaşma tikinti normalarının tərkib hissəsidir. Qaydalara əsasən, "aktiv soyutma" sistemlərinə yalnız bütün "passiv soyutma" üsulları tətbiq edildikdən və onların kifayət etmədiyi müəyyənləşdirildikdən sonra icazə verilməlidir. Passiv üsullara pəncərələrin açılması, təbii hava axınının təmin edilməsi və kölgələndirmə kimi tədbirlər daxildir.

Bu səbəbdən bəzi sakinlərə kondisionerlərdən istifadə etmək əvəzinə evin pəncərə və qapılarını açaraq təbii havalandırmadan yararlanmaq tövsiyə olunur.

Belə hallardan birində Londonun şimalında yaşayan ev sahibi binanın arxa hissəsində quraşdırılmış iki kondisioneri sökməyə məcbur olub. Apellyasiya baxışı zamanı ona mənzilinin birinci mərtəbəsindəki pəncərə və balkon qapılarını evin təbii ventilyasiyasını təmin etmək üçün açıq saxlamaq tövsiyə edilib. Təhlükəsizliklə bağlı narahatlıqlara cavab olaraq müfəttişlər riskin "o qədər də böyük olmadığını", gecə saatlarında isə pəncərələrin bağlana biləcəyini bildiriblər.

Başqa bir London sakininə isə planlaşdırma tələblərinə əməl etməsinə baxmayaraq, evində quraşdırılmış üç kondisioneri sökməsi barədə göstəriş verilib.

Kondisioner sistemləri üzrə mühəndislər bildirirlər ki, onlara Londonun müxtəlif yerlərində minlərlə funt sterlinq dəyərində, tam işlək vəziyyətdə olan qurğuların sökülməsi ilə bağlı müraciətlər daxil olur.

Londonun bəzi bələdiyyələri artıq kondisionerlərin istifadəsini ciddi şəkildə məhdudlaşdırmağa çalışır və onların yalnız zəruri hallarda tətbiqini dəstəkləyir. Məsələn, Kamden rayonunun yerli inkişaf planında qeyd olunur ki, kondisionerlərin istifadəsi təşviq edilməyəcək. Buna səbəb kimi onların enerji tələbatını artırması və yerli mikroiqlimin daha da istiləşməsinə təsir göstərməsi göstərilir.\qaynarinfo.az