Ən ciddi dağıntılar ölkənin paytaxtında qeydə alınıb. Karakasın bir neçə rayonunda yaşayış binaları çöküb. Yerli hakimiyyət orqanlarının ilkin məlumatına əsasən, azı dörd nəfər həlak olub, 20-dən çox insan müxtəlif xəsarətlərlə xəstəxanaya yerləşdirilib. Xilasedicilər dağıntılar altında qala biləcək insanların axtarışını davam etdirirlər.

"Böyük insan tələfatı və ciddi dağıntılar ehtimal olunur, fəlakətin miqyası çox böyük ola bilər", deyə ABŞ Geoloji Xidməti bildirib və ilkin qiymətləndirmədə ölənlərin sayının 10 min ilə 100 min nəfər arasında ola biləcəyini qeyd edib.

Şahidlərin sözlərinə görə, zəlzələ güclü uğultu ilə müşayiət olunub və sakinlər təşviş içində evləri və ofisləri tərk ediblər. Bir çoxları baş verənləri 1967-ci ildə Karakası da təsirləndirmiş dağıdıcı zəlzələ ilə müqayisə edirlər.

Dəymiş zərərlərə görə ölkənin Mayketiya şəhərində yerləşən ən böyük hava limanı müvəqqəti olaraq bağlanıb. Hakimiyyət orqanları zərərlərin qiymətləndirilməsi məqsədilə həftənin sonunadək təhsil müəssisələrində dərsləri ləğv edib. Xəstəxanalar gücləndirilmiş iş rejiminə keçirilib və yeni yaralıların qəbuluna hazırlaşır.

Əvvəlcə sunami təhlükəsi elan olunsa da, sonradan xəbərdarlıq ləğv edilib. Mülki müdafiə xidmətlərinin məlumatına görə, Venesuelanın neft infrastrukturu ciddi zərər görməyib, lakin enerji şirkətləri obyektlərdə yoxlamaları davam etdirirlər. Ekspertlər bildirirlər ki, elektrik enerjisində uzunmüddətli fasilələr neft hasilatına müvəqqəti təsir göstərə bilər.

Venesuela Karib və Cənubi Amerika tektonik plitələrinin sərhədində yerləşən seysmik fəal zonada yerləşir. Tarix boyu ölkə bir neçə dağıdıcı zəlzələ ilə üzləşib. Onlardan biri 1812-ci ildə baş verib və təxminən 30 min insanın həyatına son qoyub.

Goldmedia.az xatırladır ki, məlumatı Qaynarinfo "Reuters"ə istinadən yaymışdır.